काठमाडौंःजिल्ला भूमि समस्या समाधान समिति, चितवनले इच्छाकामना गाउँपालिकाका ३४ भूमिहीन दलित, भूमिहीन सुकुम्बासी तथा अव्यवस्थित बसोबासी परिवारलाई जग्गाधनी दर्ता प्रमाण–पुर्जा (लालपुर्जा) वितरण गरेको छ ।
लामो समयदेखि आफ्नो नाममा जग्गाको स्वामित्व नपाएका स्थानीयले लालपुर्जा प्राप्त गरेसँगै कानुनी रूपमा जग्गाधनी बनेका छन् । सरकारको भूमिहीन दलित, भूमिहीन सुकुम्बासी तथा अव्यवस्थित बसोबासीको समस्या समाधान गर्ने अभियानअन्तर्गत लालपुर्जा वितरणलाई देशभर तीव्र बनाइएको छ । यसैक्रममा शुक्रबार झापाको कनकाई नगरपालिकामा पनि पाँच भूमिहीन दलित तथा अव्यवस्थित बसोबासी परिवारलाई जग्गाधनी दर्ता प्रमाण–पुर्जा वितरण गरिएको छ ।
सरकारले विभिन्न जिल्लामा लालपुर्जा वितरण अभियानलाई निरन्तर विस्तार गर्दै भूमिहीन नागरिकलाई कानुनी रूपमा जग्गाधनी बनाउने कार्यलाई प्राथमिकताका साथ अघि बढाइरहेको जनाएको छ ।
